2023-cü ilin 19 sentyabrı Azərbaycan tarixində mühüm dönüş nöqtəsi oldu. Qarabağ iqtisadi rayonunda Ermənistan silahlı qüvvələrinin qalıqları tərəfindən törədilən təxribatlar artıq dözülməz həddə çatmışdı. Dövlətimizin qətiyyətli mövqeyi nəticəsində bölgədə təhlükəsizliyin təmin edilməsi, separatçı silahlı dəstələrin tərksilah edilməsi və Azərbaycan Respublikasının konstitusiya quruluşunun tam bərpa olunması məqsədilə antiterror əməliyyatına başlanıldı.
Cəmi 23 saat davam edən bu əməliyyat sürəti, dəqiqliyi və strateji peşəkarlığı ilə fərqləndi. Azərbaycan Ordusu qarşıya qoyulan bütün vəzifələri yüksək dəqiqliklə yerinə yetirdi. Qanunsuz silahlı dəstələr təslim oldu, Ermənistan silahlı qüvvələrinin qalıqları isə tam tərksilah edildi. Beləliklə, ölkəmizin suverenliyi faktiki olaraq tam bərpa olundu.
Bu əməliyyat yalnız hərbi uğur deyildi, həm də siyasi iradənin, milli birliyin və dövlətçilik prinsiplərinin təntənəsi idi. 2020-ci ildəki 44 günlük Vətən müharibəsindən sonra Azərbaycanın əksər torpaqları işğaldan azad edilmişdi, lakin bölgədə mövcud olan separatçı silahlı qruplar təhlükəsizlik və sabitlik üçün ciddi təhdid yaradırdı. 19–20 sentyabr 2023-cü il əməliyyatı ilə bu təhlükə birdəfəlik aradan qaldırıldı.
Azərbaycan xalqı bu qələbə ilə bir daha əmin oldu ki, dövlət öz milli maraqlarını və suverenliyini qorumaqda heç vaxt güzəştə getmir. Qarabağın bütün guşələrində Azərbaycan Respublikasının Dövlət Bayrağının dalğalanması həm tariximizin, həm də gələcəyimizin möhkəm zəmanətinə çevrildi.
Əldə edilən bu zəfər, bölgədə yeni siyasi və geosiyasi reallıqlar yaratdı. Azərbaycan öz ərazilərində tam nəzarəti bərpa etdi, dövlət qurumlarının fəaliyyəti genişləndirildi və vətəndaşların təhlükəsizliyi təmin olundu. Bu hadisə yalnız bu günümüz üçün deyil, həm də gələcək nəsillər üçün böyük dərsdir. O, milli birliyin, dövlətin güclü iradəsinin və ordumuzun qüdrətinin bariz nümunəsidir.
19–20 sentyabrda qazanılan möhtəşəm nəticə Azərbaycan tarixində əbədi qalacaq. Bu qələbə xalqımıza bir daha sübut etdi ki, milli birlik və qətiyyətli addımlar sayəsində hər bir çətinlik dəf olunur, hər bir maneə aradan qalxır və dövlətimizin əzəməti bütün dünyaya nümayiş etdirilir.
Rəna Süleymanlı
Yeni Azərbaycan Partiyası, məsləhətçi
