4 fevral 2026-cı il tarixində Əbu-Dabidə keçirilən “Zayed İnsan Qardaşlığı Mükafatı”nın təqdimolunma mərasimi beynəlxalq ictimaiyyətin diqqət mərkəzində oldu. Bu mötəbər tədbirdə Azərbaycan Respublikasının Prezidenti İlham Əliyevin iştirakı və çıxışı ölkəmizin humanizm, tolerantlıq və multikulturalizm dəyərlərinə verdiyi töhfələrin dünya miqyasında tanındığını bir daha nümayiş etdirdi.
Prezident İlham Əliyev çıxışında insan qardaşlığının yalnız ideya deyil, real siyasət və gündəlik həyat tərzi olmalı olduğunu vurğuladı. O qeyd etdi ki, fərqli dinlərə, mədəniyyətlərə və etnik kimliklərə hörmət müasir dünyanın ən vacib çağırışlarından biridir və bu dəyərlərin qorunması dövlətlərin birgə məsuliyyətidir.
Azərbaycanın tarixən müxtəlif mədəniyyətlərin dinc yanaşı yaşadığı məkan olduğunu xatırladan dövlət başçısı, ölkəmizdə multikulturalizmin dövlət siyasəti səviyyəsində təşviq edildiyini bildirdi. Prezident İlham Əliyev Azərbaycanın bu sahədə topladığı təcrübənin beynəlxalq əməkdaşlıq üçün nümunə ola biləcəyini xüsusi qeyd etdi.
Çıxış zamanı Prezident İlham Əliyev dünyada artan qarşıdurmalar, dini və milli zəmində baş verən münaqişələr fonunda dialoqun və qarşılıqlı anlayışın vacibliyinə diqqət çəkdi. O, sülhün və sabitliyin yalnız ədalətə, qarşılıqlı hörmətə və humanist dəyərlərə söykəndiyi halda davamlı ola biləcəyini vurğuladı.
“Zayed İnsan Qardaşlığı Mükafatı”nın mahiyyətinə toxunan Prezident İlham Əliyev, bu mükafatın bəşəri dəyərlərin təşviqi baxımından mühüm rol oynadığını bildirdi. Onun sözlərinə görə, belə təşəbbüslər xalqları bir-birinə yaxınlaşdırır və qlobal miqyasda etimadın möhkəmlənməsinə xidmət edir.
Sonda Prezident İlham Əliyev Azərbaycanın bundan sonra da sülhə, dialoqa və insan qardaşlığına xidmət edən beynəlxalq təşəbbüslərdə fəal iştirak edəcəyini bəyan etdi. Əbu-Dabidə səsləndirilən bu mesajlar bir daha göstərdi ki, Azərbaycan humanizm dəyərlərinə sadiq, məsuliyyətli və etibarlı beynəlxalq tərəfdaş kimi çıxış edir.
Ramil Mehdiyev,
Nizami Rayon Sosial-İctimai Maarifləndirmə İctimai Birliyinin İnnovativ ideyaların reallaşdırılması və kommunikasiya şöbəsinin müdiri
