Müstəqil Azərbaycan dövlətinin ən böyük nailiyyətlərindən biri güclü və peşəkar ordunun yaradılmasıdır. Azərbaycan Respublikasının Silahlı Qüvvələri xalqımızın təhlükəsizliyini təmin edən, dövlətimizin sərhədlərini qoruyan müqəddəs bir qurumdur. Hər il 26 İyun tarixində qeyd edilən Silahlı Qüvvələr Günü bu qüdrətin təntənəsidir.
Azərbaycan Ordusunun formalaşmasında Ümummilli Lider Heydər Əliyevin müstəsna xidmətləri olmuşdur. Onun rəhbərliyi ilə ordu quruculuğu sistemli şəkildə həyata keçirilmiş, peşəkar zabit korpusu yaradılmış və müasir hərbi idarəetmənin əsasları formalaşdırılmışdır.
1990-cı illərin əvvəllərində ölkədə hökm sürən xaos və siyasi böhran ordunun inkişafına mane olurdu. Lakin Heydər Əliyevin qətiyyətli siyasəti nəticəsində nizami ordu yaradıldı və dövlətçiliyimizin əsas sütunlarından biri möhkəmləndirildi.
Azərbaycanın NATO ilə əməkdaşlığı, beynəlxalq hərbi proqramlarda iştirakı və sülhməramlı missiyalarda qazandığı təcrübə ordumuzun peşəkarlığını artırdı. Hərbçilərimiz müasir döyüş hazırlığına yiyələndilər və beynəlxalq standartlara uyğun fəaliyyət göstərməyə başladılar.
Prezident İlham Əliyevin rəhbərliyi dövründə Silahlı Qüvvələrimiz daha da gücləndirildi. Müdafiə sənayesi yaradıldı, yeni hərbi hissələr istifadəyə verildi, Komando briqadaları formalaşdırıldı və ordunun texniki imkanları genişləndirildi.
2020-ci ildə baş vermiş Vətən müharibəsi ordumuzun qüdrətini bütün dünyaya nümayiş etdirdi. Azərbaycan əsgəri yüksək vətənpərvərlik ruhu, qəhrəmanlığı və peşəkarlığı sayəsində tarixi Zəfər qazandı. Bu qələbə xalq-ordu birliyinin parlaq təzahürü oldu.
Vətən müharibəsindən sonra ordumuzun modernləşdirilməsi prosesi daha da sürətləndi. Türkiyə Silahlı Qüvvələrinin modeli əsasında aparılan islahatlar döyüş qabiliyyətini yeni səviyyəyə yüksəltdi. Komando qüvvələrinin yaradılması bu sahədə mühüm addım oldu.
Bu gün Azərbaycan Ordusu güclü dövlətimizin qürur mənbəyidir. Əsgər və zabitlərimizin fədakarlığı, şəhidlərimizin müqəddəs xatirəsi hər bir vətəndaş üçün örnəkdir. Silahlı Qüvvələrimiz ölkəmizin müstəqilliyinin və təhlükəsizliyinin etibarlı qarantı olaraq fəaliyyətini uğurla davam etdirir.
Sevda Lalayeva,
YAP Nizami rayon təşkilatının fəalı
