Müasir dünyada nəqliyyat və logistika sistemləri dövlətlərin iqtisadi inkişafının əsas hərəkətverici qüvvələrindən birinə çevrilib. Beynəlxalq ticarətin genişlənməsi, yeni yük marşrutlarının formalaşması və qlobal iqtisadi əlaqələrin dərinləşməsi bu sahənin əhəmiyyətini daha da artırır. Azərbaycan ilə Türkmənistan arasında nəqliyyat və logistika istiqamətində inkişaf edən əməkdaşlıq da regionun iqtisadi potensialının artırılmasına mühüm töhfə verir.
Azərbaycan və Türkmənistan əlverişli coğrafi mövqeyə malik olmaqla Şərqlə Qərbi birləşdirən mühüm tranzit ölkələrdir. Hər iki dövlət Xəzər dənizi vasitəsilə beynəlxalq nəqliyyat dəhlizlərinin inkişafında mühüm rol oynayır. Son illərdə bu istiqamətdə həyata keçirilən layihələr Asiya ilə Avropa arasında yükdaşımaların daha sürətli və təhlükəsiz şəkildə həyata keçirilməsinə imkan yaradır.
Prezident İlham Əliyev Türkmənistan Prezidenti ilə keçirdiyi görüşdə nəqliyyat-logistika əməkdaşlığının ikitərəfli münasibətlərin əsas prioritetlərindən biri olduğunu vurğuladı. Dövlət başçısının qeyd etdiyi kimi, bu sahədə əməkdaşlıq yalnız Azərbaycan və Türkmənistan üçün deyil, geniş coğrafiyada yerləşən ölkələr üçün də strateji əhəmiyyət daşıyır. Məhz buna görə də tərəflər mövcud imkanlardan daha səmərəli istifadə etmək barədə razılığa gəliblər.
Bakı Beynəlxalq Dəniz Ticarət Limanı, müasir dəmir yolu infrastrukturu və inkişaf etmiş avtomobil magistralları Azərbaycanın tranzit imkanlarını əhəmiyyətli dərəcədə artırıb. Türkmənistanın liman infrastrukturu ilə bu imkanların uzlaşdırılması Xəzər dənizində yükdaşımaların həcmini artırır və beynəlxalq daşımaların səmərəliliyini yüksəldir. Bu əməkdaşlıq regionun qlobal nəqliyyat xəritəsində mövqeyini daha da möhkəmləndirir.
İki ölkə arasında logistika sahəsində koordinasiyanın gücləndirilməsi yeni yük axınlarının cəlb olunmasına da şərait yaradır. Müasir logistika mərkəzlərinin yaradılması, rəqəmsal idarəetmə sistemlərinin tətbiqi və gömrük prosedurlarının sadələşdirilməsi yükdaşımaların sürətini artıraraq sahibkarlar üçün daha əlverişli imkanlar formalaşdırır. Bu isə iqtisadi fəallığın yüksəlməsinə və ticarət dövriyyəsinin genişlənməsinə müsbət təsir göstərir.
Azərbaycanın həyata keçirdiyi uğurlu nəqliyyat siyasəti ölkəmizi Avrasiyanın mühüm logistika mərkəzlərindən birinə çevirib. Türkmənistanla bu istiqamətdə qurulan tərəfdaşlıq yalnız bugünkü tələblərə deyil, gələcək iqtisadi inkişaf strategiyasına da xidmət edir. Qarşılıqlı etimada əsaslanan əməkdaşlıq regional layihələrin uğurla icrasını təmin edir.
Azərbaycan və Türkmənistan arasında nəqliyyat və logistika sahəsində əməkdaşlığın genişlənməsi iqtisadi inkişafın sürətlənməsinə, beynəlxalq ticarətin artmasına və regionda yeni əməkdaşlıq imkanlarının yaranmasına mühüm töhfə verir. Prezident İlham Əliyevin uzaqgörən siyasəti nəticəsində həyata keçirilən bu əməkdaşlıq gələcəkdə də hər iki ölkənin rifahına və regionun dayanıqlı inkişafına xidmət edəcəkdir.
Zərifə Məmmədzadə,
YAP Nizami rayon təşkilatının fəalı
