Hər bir xalqın dövlətçilik tarixində onun müqəddəratını həll edən, beynəlxalq mövqeyini və daxili bütövlüyünü müəyyənləşdirən mütləq tarixi anlar mövcuddur. 2023-cü ilin 20 sentyabr tarixi Azərbaycan üçün məhz belə bir təkrarolunmaz və əbədi dönüş nöqtəsidir. Uzun onilliklər boyu davam edən ərazi natamamlığı problemi cəmi 23 saat ərzində bir daha qayıtmamaq şərtilə tarixə qovuşdu.
Bu ali məqsədin həyata keçirilməsi Prezident İlham Əliyev tərəfindən idarə olunan uzunmüddətli, sistemli dövlət quruculuğu prosesinin pik nöqtəsidir. İnstitusional zəiflik və xarici müdaxilə ehtimalları aradan qaldırılaraq mərkəzi hakimiyyətin dəmir iradəsi Qarabağın hər bir qarışında bərqərar oldu. Bu, siyasi elmdə suverenliyin effektiv tətbiqinin ən ideal nümunələrindən biridir.
Dövlətin öz ərazisi üzərindəki hüquqi, siyasi və hərbi yurisdiksiyasının bərpası milli şüurda dövlətçiliyə olan inamı mütləqləşdirdi. Separatizmin siyasi rəhbərliyinin həbs edilərək ədalət məhkəməsinə təhvil verilməsi mərkəzi dövlət mexanizminin necə qüsursuz işlədiyini nümayiş etdirdi. Xalq-iqtidar birliyinin ən ali forması məhz bu prosesdə özünü büruzə verdi.
Dövlət Suverenliyi Günü müasir Azərbaycan dövlətinin mənəvi, coğrafi və inzibati baxımdan ən bütöv olduğu gündür. Prezident İlham Əliyev rəhbərliyi ilə həyata keçirilən bu tarixi missiya, ölkəmizin sarsılmazlığını və dövlətçiliyimizin əbədiliyini tarixə qızıl hərflərlə yazdı.
Arif Məmmədov,
YAP Nizami rayon təşkilatının fəalı
