Şuşa – Azərbaycan xalqının qəhrəmanlıq məktəbi
Vətənə sevgi, milli dəyərlərə bağlılıq və torpaq uğrunda mübarizə Azərbaycan xalqının tarixində mühüm yer tutur. Şuşanın azad edilməsi bu dəyərlərin ən parlaq şəkildə təzahür etdiyi hadisələrdən biridir. Şəhərin azadlığı uğrunda aparılan döyüşlər gələcək nəsillər üçün əsl qəhrəmanlıq məktəbinə çevrilib.
Azərbaycan Ordusunun əsgər və zabitləri Şuşa uğrunda döyüşlərdə misilsiz cəsarət nümayiş etdirdilər. Onlar mürəkkəb dağlıq relyefdə, çətin hava və döyüş şəraitində irəliləyərək düşmənin müdafiə mövqelərini yarmağa nail oldular. Bu əməliyyat hərbçilərimizin yüksək hazırlığını, fiziki dözümlülüyünü və mənəvi gücünü nümayiş etdirdi.
Prezident, Müzəffər Ali Baş Komandan İlham Əliyevin rəhbərliyi ilə qazanılan Zəfər xalqımızın qəhrəmanlıq tarixində yeni səhifə açdı. Dövlət başçısının qətiyyətli siyasəti və Ordumuzun peşəkarlığı nəticəsində Azərbaycan öz ərazi bütövlüyünün bərpası istiqamətində tarixi nailiyyət əldə etdi. Şuşanın azad edilməsi bu qələbənin ən mühüm rəmzlərindən biri oldu.
Bu gün məktəblərdə və müxtəlif təhsil müəssisələrində Şuşa döyüşləri, Vətən müharibəsi və qəhrəman hərbçilərimizin fəaliyyəti haqqında maarifləndirici tədbirlərin keçirilməsi xüsusi əhəmiyyət daşıyır. Gənc nəslin bu tarixi hadisələri dərindən öyrənməsi onların vətənpərvərlik ruhunda formalaşmasına xidmət edir. Şuşa Zəfəri gələcək nəsillərə milli məsuliyyət hissi aşılayır.
Şuşa qəhrəmanlıq məktəbi olmaqla yanaşı, xalqımızın birliyinin və dövlətimizin gücünün də simvoludur. Bu şəhərin azadlığı uğrunda canından keçən şəhidlərimizin xatirəsi daim yaşayacaq. Şuşa Şəhəri Günü hər bir azərbaycanlıya Vətən qarşısında məsuliyyətini və milli dəyərlərə sədaqətini xatırladır.
Emil Novruzov,
YAP Nizami rayon təşkilatının “Oqtay Vəliyev küçəsi, 1” ərazi partiya təşkilatının sədri
