8 Mart Beynəlxalq Qadınlar Günü bütün dünya qadınlarının bayramıdır. Bu bayramın sevincindən Azərbaycan Qadınlarına pay düşür. Çünki dünya elmində, mədəniyyətində, ictimai-siyasi həyatında Azərbaycan qadının öz yeri var. Azərbaycan qadını Şərq aləmində bir sıra ilklərə imza atıb. Təkcə onu demək kifayətdir ki, Şərqin ilk demokratik respublikası olan Azərbaycan Xalq Cümhuriyyəti dövründə seçib-seçilmək hüququ Azərbaycan qadınına verilmişdir.
Qadın anadır, qadın həyat yoldaşıdır, qadın ictimai xadimdir. Azərbaycan qadını XX əsrin əvvələrindən başlayaraq ictimai həyatımızın bütün sahələrində aktiv şəkildə fəaliyyət göstərib. Azərbaycan xanımları öz dərin zəkası, istedadı, zəhmətkeşliyi ilə həyat yoldaşlarına, oğullarına arxa-dayaq olmuşlar. Hələ Böyük Vətən müharibəsi dövründə arxa cəbhədə fədakarlıq göstərmiş, cəbhədə olan oğulların əvəzindən çalışmış, cəbhəyə hər cür yardım etmişdir. Ən başlıcası Azərbaycan xanımları qəhrəman şəhid və qazilərin anasıdır. Bu qəhrəmaları yetirən ana dünyanın ən uca varlığıdır. Polad Həşimov, Mübariz İbrahimov, Cəbrayıl Dövlətzadənin, həmçinin minlərlə şəhid və qazilərin anası müqəddəsdir Azərbaycan xalqı üçün. Şəhid və qazi anası bizim hamımızın hörmətinə, məhəbbətinə layiqdir. Bütün bayramlarımızda qəhrəman oğulları ilə birgə ən çox haqları olan insanlardır. Həm birinci Qarabağ müharibəsində, həm də 2020-ci il 44 günlük müharibə zamanı igidlərimizin qəhrəmanlığının müəllifi analardır. Ancaq aslan ürəkli analar aslan ürəkli, şir biləkli igidlər böyüdə bilər. İşğaldan azad olan ata-baba yurdlarımızın hər qarışı uğrunda qan tökən mərd, mübariz oğullarımızın fədakar analarına eşq olsun!
Humay Vəliyeva,
Sabunçu qəsəbəsi, 155 nömrəli tam orta məktəbin Azərbaycan dili və ədəbiyyat müəllimi
