Laçın: Tarixi Zəfərdən Müasir Sosial Rifaha Doğru

Azərbaycanın ən qürurlu tarixlərindən biri olan 26 avqust – Laçın Şəhəri Günü ölkəmizin suverenliyinin və əzmkarlığının simvoludur. Otuz ilə yaxın davam edən erməni işğalından sonra Müzəffər Ali Baş Komandanın rəhbərliyi ilə azad edilən bu qədim diyar qısa müddət ərzində tamamilə yenidən qurulmuşdur. Rayonda həyata keçirilən genişmiqyaslı bərpa işləri keçmişin bütün izlərini silərək bölgəni regionun ən müasir məkanına çevirmişdir.

“Böyük Qayıdış” Dövlət Proqramı çərçivəsində minlərlə laçınlı otuz illik həsrətdən sonra doğma yurdlarına qayıdaraq daimi məskunlaşmışdır. Zabux, Sus və Bəylik kəndləri, eləcə də Laçın şəhəri ən yüksək standartlara uyğun şəkildə bərpa edilərək sakinlərin istifadəsinə verilmişdir. İnşa edilən müasir fərdi evlər, məktəblər, uşaq bağçaları və tibb məntəqələri vətəndaşların rahatlığı üçün hərtərəfli şərait yaradır.

İqtisadi sahədə əldə edilən uğurlar da diqqəti cəlb edir. Laçın Aqro-Sənaye Parkında yaradılan mebel, tikiş və ayaqqabı fabrikləri yerli əhalinin məşğulluğunu təmin etməklə yanaşı, rayonun iqtisadi müstəqilliyini gücləndirir. Eyni zamanda, Qarabağda ilk nərəyetişdirmə müəssisəsi olan “Həkəri Balıq Təsərrüfatı” aqrar sektorun inkişafında mühüm rol oynayır.

Infrastruktur və logistika baxımından dəniz səviyyəsindən 1700 metr hündürlükdə istifadəyə verilən Laçın Beynəlxalq Hava Limanı bölgəni qlobal miqyasda əlçatan etmişdir. Kəlbəcər-Laçın avtomobil yolu və rayonda tətbiq olunan yaşıl enerji layihələri isə ekoloji təmiz və dayanıqlı inkişafın təminatçısıdır.

Laçının timsalında bütün Şərqi Zəngəzurun sürətlə dirçəlməsi Azərbaycan dövlətinin iqtisadi qüdrətinin və quruculuq siyasətinin parlaq təzahürüdür. Bu qədim diyar bu gün sülhün, əməkdaşlığın və firavan həyatın mərkəzinə çevrilmişdir.

Regina Kovalyova,
YAP Nizami rayon təşkilatının fəalı