Dünya enerji bazarında baş verən dəyişikliklər və geosiyasi gərginliklər bir çox ölkələri enerji təhlükəsizliyi ilə bağlı narahatlıqlara sövq edir. Lakin Azərbaycan bu baxımdan sabit mövqeyə malikdir və cənab prezident İlham Əliyevin də qeyd etdiyi kimi, ölkəmiz enerji təchizatı baxımından heç bir qıtlıqla üzləşmir. Əksinə, Azərbaycan bu sahədə beynəlxalq səviyyədə etibarlı tərəfdaş kimi tanınır və enerji ixracatı sahəsində mühüm rol oynayır.
Azərbaycan zəngin neft və qaz ehtiyatlarına malikdir və uzun illərdir ki, enerji sektorunda dayanıqlı inkişaf siyasəti həyata keçirir. Ölkəmizdə hasil edilən neft və qaz təkcə daxili bazarı təmin etmir, eyni zamanda bir çox xarici ölkələrə də ixrac olunur. Xüsusilə, Cənub Qaz Dəhlizi layihəsi çərçivəsində Azərbaycan Avropanın enerji təhlükəsizliyinə töhfə verən əsas iştirakçılarından birinə çevrilib.
Hazırda Azərbaycan 12-dən çox ölkəyə qaz ixrac edir ki, onlardan 10-u Avropa dövlətləridir. Bununla yanaşı, Bakı-Tbilisi-Ceyhan və Bakı-Supsa neft kəmərləri ölkəmizin neft ixracını dünya bazarına çıxarmaqda mühüm rol oynayır. Bütün bunlar onu göstərir ki, Azərbaycan enerji mənbələri baxımından kifayət qədər ehtiyatlara malikdir və bu sahədə heç bir qıtlıq problemi yaşamır. Azərbaycan yalnız neft və qaz ehtiyatları ilə kifayətlənmir, eyni zamanda bərpaolunan enerji sahəsində də ciddi addımlar atır. Ölkəmizdə günəş və külək enerjisinin inkişafı ilə bağlı genişmiqyaslı layihələr həyata keçirilir. Artıq dünyanın aparıcı enerji şirkətləri ilə müqavilələr imzalanıb və yaxın illərdə ölkəmiz yaşıl enerjini də xaricə ixrac edəcək. Xüsusilə Xəzər dənizində külək enerjisi potensialının yüksək olduğu nəzərə alınaraq, bu sahədə böyük sərmayələr qoyulmaqdadır. Azərbaycanın məqsədi regionda yaşıl enerji mərkəzinə çevrilməkdir. Azərbaycanın enerji strategiyası təkcə daxili bazara deyil, həm də beynəlxalq enerji təhlükəsizliyinə yönəlib. Ölkəmiz Avropanın enerji təchizatında mühüm rol oynayır və bu istiqamətdə uzunmüddətli tərəfdaşlıq əlaqələrini gücləndirir.
Bütün bu faktorlar onu göstərir ki, Azərbaycan enerji təchizatı baxımından heç bir qıtlıqla üzləşmir. Əksinə, ölkəmiz həm ənənəvi, həm də bərpaolunan enerji sahəsində böyük potensiala malikdir və bu sahədəki uğurları ilə dünya enerji bazarında etibarlı icraçı kimi mövqeyini möhkəmləndirir.
Zeynəb Abasova,
Maştağa qəsəbəsi 187 nömrəli tam orta məktəbin müəllimi
