Tolerantlıq, sülh və qarşılıqlı hörmət prinsiplərini dövlət siyasəti səviyyəsinə yüksəldən Azərbaycan qlobal mənəvi dialoqların əsas mərkəzi kimi çıxış edir. Sentyabrın 15-də Prezident İlham Əliyev tərəfindən həyata keçirilən ali qəbul bu mühüm strateji xəttin ən bariz göstəricisi və məntiqi davamı oldu. Dövlət başçısı Türk Dövlətləri Təşkilatının (TDT) Müsəlman Dini Rəhbərləri Şurasının 7-ci toplantısının iştirakçılarını, Yəhya Bakuvi Beynəlxalq Konfransının təşkilatçılarını və Qafqaz Xalqları Ali Dini Şurasının üzvlərini qəbul edərək regional qardaşlıq və sülh bağlarını daha da möhkəmləndirdi. Nümayəndə heyətinin tərkibindəki TDT Baş katibinin və çoxsaylı qardaş ölkələrin ali dini rəhbərlərinin iştirak etməsi, habelə Prezident İlham Əliyevin səsləndirdiyi hədəflər ölkəmizin təkcə siyasi arenada deyil, həm də Türk və İslam coğrafiyasının mənəvi birliyinin təmin olunmasında necə əvəzsiz rol oynadığını bütün aydınlığı ilə ortaya qoydu.
Dövlət başçısı öz dərin məzmunlu çıxışında ölkəmizin tarixi və mədəni simasına işıq salaraq, xalqımızın zəngin intellektual irsi ilə qürur duyduğunu bildirdi. O, Seyid Yəhya Bakuviyə həsr edilmiş beynəlxalq konfransla dini rəhbərlərin mötəbər Zirvəsinin eyni günlərdə keçirilməsini Azərbaycanın həm öz keçmişinə, həm də ortaq dini dəyərlərə olan ehtiramının göstəricisi kimi dəyərləndirdi. Nizami, Nəsimi, Xətai və Füzuli kimi böyük dühaların yaradıcılığının İslam və dünya fəlsəfəsinin ayrılmaz parçası olduğunu vurğulayan Prezident İlham Əliyev, eyni zamanda qədim dövlətçilik tariximizə də xüsusi nəzər saldı. O bildirdi ki, Qafqaz Albaniyasının və Atabəylər dövlətinin mövcud olduğu Azərbaycan ərazisi, bu gün TDT daxilində yeganə Qafqaz ölkəsi olaraq həm Qafqazı, həm də Türk dünyasını bir-birinə bağlayan sarsılmaz, əbədi və qüdrətli bir məkandır.
İslam aləminin birliyi, əmin-amanlığı və həmrəyliyi məsələsi Prezident İlham Əliyevin çıxışının ana xəttini təşkil edirdi. O, dini liderlərin öz icmalarına verdiyi sülh mesajlarının bölgədə sabitliyin qorunmasındakı əvəzsiz və vacib rolunu qeyd etdi. Azərbaycanın İƏT və digər təşkilatlar vasitəsilə daim barışdırıcı, birləşdirici bir qüvvə kimi çıxış etdiyini deyən dövlət başçısı, IV İslam Həmrəylik Oyunlarının təşkilatçılıq uğurunu ölkəmizin qardaşlıq idealına sadiqliyinin əyani nümunəsi kimi göstərdi. Gələn il Bakıda keçiriləcək İƏT Zirvə Görüşünə böyük ümidlər bəsləyən Prezident İlham Əliyev, müsəlman dövlətləri arasındakı ixtilafların və kənar, zərərli müdaxilələrin yalnız xalqlarımızın və dövlətlərimizin birliyi, mütləq vəhdəti sayəsində aradan qaldırıla biləcəyini qətiyyətlə bildirdi.
Tarixi Vətən müharibəsindəki qələbəmiz və işğaldan azad edilmiş ərazilərin dirçəlişi ilə bağlı fikirlər isə çıxışın ən qürurverici və təsirli məqamı idi. Qonaqların Qarabağa edəcəkləri səfərlə bağlı danışan Prezident İlham Əliyev, erməni işğalçılarının 30 il ərzində törətdiyi vəhşiliklərdən, 65 məscidin tamamilə dağıdılması və donuz saxlanılaraq murdarlanması hallarından ətraflı bəhs etdi. Dövlət başçısı bu faktların bütövlükdə İslam dünyasına qarşı törədilən ən böyük cinayətlərdən biri olduğunu vurğuladı. Buna rəğmən, qətiyyətlə bildirdi ki, Azərbaycan xalqı məhz öz hərbi qüdrəti, qan-qadası və yenilməz iradəsi ilə bu böyük ədalətsizliyə son qoydu. Hazırda Qarabağ və Şərqi Zəngəzurda 90 mindən çox insanın yenidən məskunlaşaraq fəaliyyət göstərməsi isə Müzəffər Azərbaycan dövlətinin quruculuq əzminin və Prezident İlham Əliyevin yenilməz, sarsılmaz siyasətinin şanlı rəmzidir.
Aytac Şahverənli,
YAP Nizami rayon təşkilatının fəalı
