Müasir beynəlxalq münasibətlərdə dövlətin nüfuzu onun milli maraqlarını qorumaq bacarığı ilə yanaşı, regional əməkdaşlıq proseslərində fəal iştirakından da asılıdır. Prezident İlham Əliyevin Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşündə iştirakı Azərbaycanın regional diplomatiyasının genişlənməsini nümayiş etdirir. Azərbaycanın bu formata tamhüquqlu üzv kimi qoşulması ölkəmizin Mərkəzi Asiya dövlətləri ilə siyasi dialoqunu daha sistemli müstəviyə çıxarır.
Azərbaycanın regional diplomatiyasının əsas xüsusiyyətlərindən biri siyasi münasibətlərin konkret əməkdaşlıq istiqamətləri ilə tamamlanmasıdır. Prezident İlham Əliyevin çıxışında nəqliyyat, enerji, investisiya, rəqəmsal bağlantılar və humanitar münasibətlərə diqqət yetirilməsi bu yanaşmanın mahiyyətini göstərir. Belə gündəlik diplomatik görüşlərin yalnız fikir mübadiləsi ilə məhdudlaşmamasına, real iqtisadi və sosial nəticələrə yönəlməsinə şərait yaradır.
Mərkəzi Asiya ölkələri ilə münasibətlərin genişlənməsi Azərbaycanın beynəlxalq iqtisadi əlaqələrinin şaxələndirilməsi baxımından da əhəmiyyətlidir. Regional dövlətlər arasında ticarət dövriyyəsinin artması, qarşılıqlı investisiyaların təşviqi və nəqliyyat dəhlizlərinin inkişafı ölkəmizin Avrasiya iqtisadi məkanındakı mövqeyini gücləndirə bilər. Bu imkanların reallaşdırılması üçün siyasi razılaşmalarla yanaşı, biznes dairələri arasında birbaşa əlaqələrin də genişləndirilməsi vacibdir.
Azərbaycanın diplomatik fəallığı humanitar münasibətlərdə də özünü göstərir. Mərkəzi Asiya ölkələrinin işğaldan azad edilmiş ərazilərdə təhsil və mədəniyyət layihələrinə töhfə verməsi qarşılıqlı etimadın praktiki ifadəsidir. Bu təşəbbüslər dövlətlərarası münasibətlərin sosial əsaslarını genişləndirir və əməkdaşlığın gələcək nəsillər üçün də əhəmiyyətini artırır.
Prezident İlham Əliyevin regional diplomatiyası Azərbaycanın milli maraqlarını daha geniş əməkdaşlıq platformaları vasitəsilə reallaşdırmağa yönəlir. Məşvərət formatında iştirak ölkəmizə ortaq problemlərin müzakirəsində və regional təşəbbüslərin hazırlanmasında əlavə imkanlar verir. Qarşıdakı dövrdə əsas məsələ bu diplomatik üstünlükləri iqtisadi nəticələrə, yeni layihələrə və uzunmüddətli tərəfdaşlıqlara çevirməkdir.
Rasim Quliyev,
YAP Nizami rayon təşkilatının “Əliağa Kürçaylı küçəsi, 8” ərazi partiya təşkilatının sədri
