Azərbaycan Respublikasının Prezidenti İlham Əliyevin rəhbərliyi ilə ölkəmizin xarici siyasəti dostluq münasibətlərinin möhkəmləndirilməsi, qarşılıqlı etimadın artırılması və beynəlxalq əməkdaşlığın genişləndirilməsi istiqamətində ardıcıl şəkildə həyata keçirilir. Azərbaycanın müxtəlif regionlarla əlaqələrinin inkişafı milli maraqların qorunmasına və ölkəmizin beynəlxalq mövqeyinin gücləndirilməsinə xidmət edir.
Oktyabrın 13-də Prezident İlham Əliyevin Laos Xalq Demokratik Respublikasının Prezidenti Thonqlun Sisulit ilə görüşü bu siyasətin mühüm nümunələrindən biridir. Dövlət başçıları Azərbaycan-Laos münasibətlərinin hazırkı vəziyyətini müzakirə edib, gələcək əməkdaşlığın əsas istiqamətlərini müəyyənləşdiriblər.
Azərbaycanla Laos arasında 30 ildən artıqdır davam edən diplomatik münasibətlər qarşılıqlı hörmət və siyasi dialoq prinsiplərinə əsaslanır. Beynəlxalq təşkilatlarda göstərilən həmrəylik, parlamentlərarası əlaqələr və siyasi partiyalar arasında əməkdaşlıq iki ölkənin tərəfdaşlığını daha da möhkəmləndirir.
Görüş zamanı iqtisadi əlaqələrin genişləndirilməsi xüsusi diqqət mərkəzində olub. Ticarət dövriyyəsinin artırılması, investisiya layihələrinin araşdırılması və biznes dairələri arasında əlaqələrin gücləndirilməsi qarşılıqlı fayda baxımından əhəmiyyətlidir. Bakıda keçirilməsi nəzərdə tutulan Laos-Azərbaycan biznes-forumu bu istiqamətdə yeni imkanlar yarada bilər.
Prezident İlham Əliyevin həyata keçirdiyi xarici siyasət Azərbaycanın dost ölkələrlə münasibətlərinin şaxələndirilməsinə və yeni tərəfdaşlıqların qurulmasına xidmət edir. Laosla əlaqələrin inkişafı da bu strategiyanın tərkib hissəsidir. Siyasi iradə və konkret təşəbbüslər iki ölkə arasında əməkdaşlığın gələcəkdə daha da genişlənməsi üçün əlverişli zəmin yaradır.
Elxan İskəndərov,
YAP Nizami rayon təşkilatının “Heydər Əliyev prospekti, 142” ərazi partiya təşkilatının sədr müavini
