Qlobal Bakı Forumu qlobal gündəlikdəki mühüm məsələlərin müzakirə edildiyi nüfuzlu beynəlxalq platformalardan birinə çevrilib. Forum, siyasət, iqtisadiyyat, təhlükəsizlik, enerji, humanitar və digər sahələrdə aktual problemlərin həllinə dair genişmiqyaslı müzakirələrin aparıldığı bir tədbirdir. Dünyanın müxtəlif ölkələrindən sabiq və fəaliyyətdə olan dövlət və hökumət başçıları, nüfuzlu siyasətçilər, beynəlxalq təşkilatların rəhbərləri, ekspertlər və akademiklər burada iştirak edirlər. Qlobal Bakı Forumu, Nizami Gəncəvi Beynəlxalq Mərkəzinin təşkilatçılığı ilə keçirilir və qlobal sabitlik, əməkdaşlıq və dayanıqlı inkişaf kimi mühüm məsələlərin həllinə töhfə verir. Bu forum, Azərbaycanı beynəlxalq dialoq üçün mühüm bir platformaya çevirən əsas tədbirlərdən biridir.
Azərbaycan suverenliyinin və ərazi bütövlüyünün tam bərpasına yönəlmiş siyasətini heç bir təzyiq və maneələrə baxmayaraq davam etdirdi və bu məqsədinə nail oldu. 44 günlük Vətən müharibəsi və 2023-cü ilin sentyabrında həyata keçirilən lokal antiterror tədbirləri nəticəsində ölkə öz suverenliyini tam bərpa etdi. Bu, Azərbaycanın beynəlxalq hüquqa və ədalətə əsaslanan prinsipial mövqeyinin, qətiyyətli siyasətinin və güclü iradəsinin göstəricisidir. Dövlət başçısının rəhbərliyi ilə həyata keçirilən uğurlu siyasət ölkəmizin milli maraqlarını qorumağa və regionda davamlı sülhün təmin olunmasına yönəlib. Ermənistanın uzun illər davam edən işğalı və təcavüzü nəticəsində Azərbaycan xalqı misilsiz əzab-əziyyətlər çəkib. Mülki insanlara qarşı törədilmiş vəhşiliklər, etnik təmizləmə siyasəti, Xocalı soyqırımı, yüz minlərlə insanın doğma yurdundan məcburi köçkün düşməsi və dağıdılmış şəhərlər, kəndlər unudula bilməz.
Azərbaycan xalqı bu tarixi heç vaxt unutmayacaq və gələcək nəsillərə ötürəcək. Eyni zamanda, dövlətimiz işğaldan azad edilmiş torpaqlarda sürətli bərpa və quruculuq işləri aparır, keçmiş məcburi köçkünlərin öz yurdlarına qayıtmasını təmin edir. Bu, həm haqqın, həm ədalətin bərpasıdır, həm də Azərbaycanın güclü və qalib dövlət olduğunu bütün dünyaya nümayiş etdirir. Əgər Ermənistan bölgədə sülh və sabitliyin bərqərar olmasını istəyirsə, onun Konstitusiyasında Azərbaycana qarşı hər hansı ərazi iddiaları olmamalıdır. Beynəlxalq hüquq normalarına əsasən, dövlətlər bir-birinin suverenliyini və ərazi bütövlüyünü tanımalı, düşmənçilik siyasətindən imtina etməlidirlər. Azərbaycan dəfələrlə bəyan edib ki, sülh müqaviləsinin imzalanması üçün Ermənistan öz Konstitusiyasında Azərbaycana qarşı ərazi iddialarına son qoymalı və bunu rəsmi şəkildə təsdiqləməlidir. Əks halda, bu kimi müddəalar regionda uzunmüddətli sabitliyin təmin edilməsinə mane ola bilər. Əgər Ermənistan həqiqətən sülh istəyirsə, o zaman öz qanunvericiliyini beynəlxalq hüquqa uyğun şəkildə dəyişməli və Azərbaycanla münasibətləri normallaşdırmağa yönəlmiş real addımlar atmalıdır.
Azərbaycan 30 il ərzində işğalçı Ermənistan ordusuna qarşı mübarizə aparıb. 2020-ci ildə 44 günlük Vətən müharibəsi zamanı Azərbaycan Ordusu düşməni darmadağın edərək işğala son qoydu və ərazi bütövlüyünü bərpa etdi. Azərbaycan beynəlxalq hüquqa əsaslanaraq öz torpaqlarını azad etdi. Bu, yalnız hərbi qələbə deyil, həm də tarixi ədalətin bərpası idi. 2023-cü ilin sentyabrında keçirilən lokal antiterror tədbirləri isə Azərbaycan dövlətinin suverenliyini tam təmin etdi və Qarabağdakı separatçı rejimin mövcudluğuna son qoydu. İndi əsas məsələ azad olunmuş ərazilərin bərpası, keçmiş məcburi köçkünlərin yurdlarına qayıtması və bölgədə davamlı sülhün təmin olunmasıdır. Azərbaycan bu istiqamətdə ardıcıl və məqsədyönlü siyasət həyata keçirir.
Əlizadə Günel,
YAP-ın gənc fəalı
