“Xocalı Soyqırımı Memorial Kompleksinin açılışı Azərbaycan dövlətinin milli yaddaş siyasətində mühüm mərhələ kimi tarixə daxil oldu. Prezident İlham Əliyevin mərasimdəki çıxışı Xocalı faciəsinin siyasi-hüquqi qiymətinin, tarixi ədalətin bərpasının və Azərbaycanın keçdiyi dövlətçilik yolunun konseptual təqdimatı kimi səsləndi. Açılış mərasimi xalqın yaddaşı ilə dövlət iradəsinin vəhdətini nümayiş etdirən mühüm ictimai-siyasi hadisə oldu. İki il əvvəl əsası qoyulan memorialın məhz Xocalıda inşa edilməsi xüsusi tarixi məna kəsb edir. İşğal dövründə Bakıda tikilməsi planlaşdırılan layihənin azad Xocalıda reallaşdırılması dövlətin strateji baxışının və gələcəyə hesablanmış siyasi inamının nəticəsi kimi qiymətləndirilir. Bu qərar Azərbaycanın işğalla heç vaxt barışmadığını və tarixi ədalətin yalnız öz torpaqlarında bərpa ediləcəyinə olan qəti mövqeyini təsdiqlədi”.
Bunu açıqlamasında Yeni Azərbaycan Partiyası Nizami rayon təşkilatının sədr müavini Rəşadət Xalıqov deyib.
Rəşadət Xalıqov bildirib ki, uzun illər ərzində Ermənistanın və ona dəstək verən dairələrin informasiya manipulyasiyaları Xocalı həqiqətlərinin beynəlxalq miqyasda tanınmasına maneə yaratmağa çalışdı. Azərbaycan dövləti sistemli diplomatik fəaliyyət və ictimai təşəbbüslər vasitəsilə bu informasiya blokadasını aradan qaldırdı. Heydər Əliyev Fondunun təşəbbüsü ilə həyata keçirilən “Xocalıya ədalət!” beynəlxalq kampaniyası qlobal informasiya məkanında mühüm dönüş yaratdı, faciənin hüquqi və siyasi mahiyyətini dünya ictimaiyyətinin diqqətinə çatdırdı.
“Prezident İlham Əliyevin çıxışında Xocalıya ədalətin təmin olunması ardıcıl siyasi proses kimi təqdim edildi. İlk mərhələ həqiqətlərin beynəlxalq səviyyədə tanıdılması, növbəti mərhələ Azərbaycanın hərbi-siyasi gücünün formalaşdırılması, həlledici mərhələ isə Vətən müharibəsində əldə edilən qələbə oldu. 44 günlük Vətən Müharibəsi illərlə aparılan məqsədyönlü dövlət strategiyasının nəticəsi kimi xarakterizə edilir. Güclü iqtisadiyyatın qurulması, müasir silahlı qüvvələrin formalaşdırılması və beynəlxalq hüquqi bazanın möhkəmləndirilməsi Azərbaycanın qələbəsini şərtləndirən əsas amillər oldu. Azərbaycan öz ərazi bütövlüyünü hərbi-siyasi yolla bərpa edərək regionda yeni geosiyasi reallıq yaratdı. 2023-cü ildə keçirilmiş antiterror tədbirləri dövlət suverenliyinin tam bərpasını təmin etdi. Qanunsuz silahlı birləşmələrin tərk-silah olunması və separatçı rejimin ləğvi Azərbaycanın konstitusiya quruluşunun bütün ərazilərdə bərqərar olması ilə nəticələndi. Bu mərhələ Prezident İlham Əliyev tərəfindən ədalətin yekun təntənəsi kimi qiymətləndirildi”.
O əlavə edib ki, Xocalı sakinlərinin mərasimdə iştirakı sosial ədalətin bərpasının real təcəssümü oldu. Uzun illər məcburi köçkün həyatı yaşamış insanların doğma şəhərlərində memorial açılışında iştirak etməsi Azərbaycanın postmünaqişə dövründə həyata keçirdiyi bərpa və reinteqrasiya siyasətinin uğurunu göstərdi. Xocalıda ucaldılan Memorial Kompleks keçmişin ağrısını tarixi dərsə, milli iradəni isə dövlət gücünə çevirən siyasi rəmz kimi qiymətləndirilir. Bu abidə Azərbaycanın müstəqil siyasətinin, əyilməz iradəsinin və bərpa edilmiş ədalətin ifadəsidir. Xocalı artıq yalnız hüznün adı deyil. Xocalı Azərbaycan dövlətinin qətiyyətinin, xalqın dözümünün və tarixi ədalətin qələbəsinin rəmzi kimi yeni məna qazanıb.
