Tarzən Əhsən Dadaşovun 100 illik yubileyinə həsr olunmuş tədbir keçirilib
13 fevral 2025-ci il tarixdə YAP Şuşa rayon təşkilatının 26 nömrəli ərazi partiya təşkilatının və Şuşa rayon Turşsu kənd Uşaq Musiqi Məktəbinin birgə təşkilatçılığı ilə əməkdar artist, unudulmaz tarzən Əhsən Dadaşovun 100 illik yubileyi münasibəti ilə tədbir keçirilmişdir. İlk öncə Dövlət Himni səsləndirilib. Sonra ulu öndər Heydər Əliyevin və Respublikamızın suverenliyi və ərazi bütövlüyü uğrunda canlarını qurban vermiş şəhidlərimizin əziz xatirələri bir dəqiqəlik sükutla yad edilib.
İnfososium.az xəbər verir ki, tədbirdə YAP Şuşa rayon təşkilatının əməkdaşı Elmir Rzayev, Şuşa Rayon Mədəmiyyət İşçiləri Həmkərlar İttifaqının sədri Anar Cəbiyev, Şuşa Humanitar Kollecinin direktor muavini Azər Səfixanlı və Şuşa Rayon İcra Hakimiyyətinin nümayyəndəsi Natiq Mahmudov iştirak etmişdir.
Məktəbin direktoru İlham Həsənov qeyd edib ki,ustad tarzən heç vaxt özündən əvvəlki ifaçıları təkrarlamaz, ifa etdiyi kiçik bir musiqi parçasına da yaradıcı yanaşardı. Odur ki, onun çalğısı ilk mizrabdan tanınırdı. Əhsən Dadaşov bəstəkar qəlbli sənətkar idi. O, musiqi folklorumuzu zənginləşdirən bir çox rəng, mahnı və rəqs havaları bəstələmişdi. “Rahab”, “Şur”, “Rast”, “Humayun”, “Segah” rəngləri bu sıradandır. Onun bəstələdiyi bir çox mahnılar bu gün də dillər əzbəridir.
Daha sonra məktəbin şagirdlərdən ibarət xalq çalğı alətləri ansamblının ifasında Bayatı-Şiraz rəngi səsləndirildi. Tədbirin davamında Əhsən Dadaşovun öz səsindən xatirələri dinlənildi. Tədbir proqramında tar ifalarına və Əhsən Dadaşovun ifasında ən çox sevilən Şur muğamına üstünlük verilmişdir. Əhsən Dadaşovun müəllifi olduğu və dillər əzbəri olan “Biri sənsən, biri mən”, “Peyman etdik” mahnıları məktəbin xanəndə müəllimləri tərəfindən yüksək peşəkarlıqla səsləndirildi.
