Dövlətlərarası təhlükəsizlik əməkdaşlığının səmərəli olması üçün onun epizodik deyil, davamlı xarakter daşıması mühüm amildir. Türk Dövlətləri Təşkilatına üzv ölkələrin Təhlükəsizlik Şuraları katiblərinin Beşinci Toplantısı məhz belə davamlı dialoq formatının mövcudluğunu göstərir. Prezident İlham Əliyev toplantıda təhlükəsizlik şuraları katiblərinin müntəzəm görüşlərinin qlobal və regional təhlükələrin müzakirəsi baxımından əhəmiyyətini qeyd edib.
Müntəzəm görüşlərin əsas üstünlüklərindən biri təhlükəsizlik gündəliyinin dəyişən şəraitə uyğun olaraq yenilənməsinə imkan verməsidir. Bir neçə il əvvəl ikinci dərəcəli hesab edilən risklər sonradan daha ciddi xarakter ala bilər. Kibertəhlükələr, kritik infrastrukturun qorunması, informasiya təhlükəsizliyi və transmilli cinayətkarlıq buna nümunədir. Davamlı dialoq təhlükəsizlik qurumlarının belə dəyişiklikləri birgə müzakirə etməsinə şərait yaradır.
Prezident İlham Əliyevin Beşinci Toplantının iştirakçıları ilə görüşündə səsləndirdiyi fikirlər TDT çərçivəsində təhlükəsizlik məsələlərinin sistemli şəkildə müzakirə edilməsinin vacibliyini göstərir. Belə toplantılar dövlətlərin mövqelərinin öyrənilməsi ilə yanaşı, ortaq problemlərin müəyyənləşdirilməsinə də imkan verir. Bununla yanaşı, hər bir ölkənin milli təhlükəsizlik prioritetləri və hüquqi çərçivəsi nəzərə alınmaqla əməkdaşlığın formaları müəyyənləşdirilir.
Vəfa Bayramova,
YAP Nizami rayon təşkilatının fəal üzvü
