Azərbaycanın əsas hissəsi ilə Naxçıvan Muxtar Respublikasını quru yolu ilə birləşdirmək Azərbaycan dövlətinin çoxdankı siyasi hədəfi olmuşdur. İkinci Qarabağ müharibəsinin nəticəsi olaraq, Ermənistanın kapitulyasiyasını rəsmiləşdirən və Prezident İlham Əliyevin imzaladığı üçtərəfli bəyanatda Zəngəzur dəhlizinin açılmasına dair xüsusi bənd öz əksini tapmışdır. Müharibədən sonrakı 5 il ərzində Ermənistan tərəfinin məsələni süni şəkildə uzatmasına və praktiki addımlar atmamasına baxmayaraq, Prezident İlham Əliyev bu dəhlizin reallaşması istiqamətində qətiyyətli mövqeyini qoruyub saxlamışdır. Bu sarsılmaz iradə ölkəmizin hədəfə inamla yaxınlaşmasını təmin etmişdir.
Zəngəzur dəhlizinin beynəlxalq logistika xətti kimi reallaşmasında qlobal miqyaslı təmaslar mühüm rol oynamışdır. 2025-ci il avqustun 8-də keçirilən tarixi Vaşinqton Zirvə Görüşündə bu məsələ öz həllini tapmış və TRIPP adını daşıyan qlobal nəqliyyat layihəsinin icrasına start verilmişdir. Eyni zamanda, 2026-cı il avqustun 8-də Prezident İlham Əliyev ilə ABŞ Prezidenti cənab Tramp arasında aparılan telefon söhbətində bu önəmli nəqliyyat layihəsinin mütləq və tezliklə icra ediləcəyi hər iki tərəfdən təsdiqlənmişdir. Bu ali səviyyəli razılaşmalar layihənin qlobal əhəmiyyətini bir daha sübut edir.
İnfrastrukturun inşası sahəsində Azərbaycan Prezident İlham Əliyevin rəhbərliyi ilə öz üzərinə düşən öhdəlikləri sürətlə yerinə yetirir. Hazırda Horadiz–Ağbənd avtomobil yolu demək olar ki, yekunlaşmaq üzrədir və dəmir yolunun tikintisi də sürətlə aparılır. Naxçıvan ərazisində isə mövcud dəmir yolunun cəmi 1,5 milyon ton yükaşırma qabiliyyətinə malik olmasını nəzərə alaraq, 15 milyon ton yükü qaldıra biləcək tamamilə yeni texniki-iqtisadi əsaslandırma ilə 194 kilometr uzunluğunda yeni xətt inşa ediləcəkdir. Ermənistan ərazisində isə tikintisi nəzərdə tutulan dəmir yolunun uzunluğu cəmi 42 kilometr təşkil edir.
Şərq-Qərb və Şimal-Cənub nəqliyyat dəhlizlərinin mühüm qolu olan bu layihə beynəlxalq aktorların, xüsusilə də Avropa İttifaqının böyük marağına səbəb olmuşdur. Avropa İttifaqı nümayəndələri Naxçıvana ezam edilərək vəziyyətlə tanış olmuş və Naxçıvan dəmir yolunun reabilitasiyası üçün nəzarət paketi Azərbaycan dövlətinə məxsus olmaq şərti ilə beynəlxalq konsorsiumun yaradılması ehtimalı gündəmə gəlmişdir. Zəngəzur dəhlizi təkcə nəqliyyat yolu deyil, həm də işğaldan azad edilmiş Cəbrayıl rayonunda inşa olunmuş yarımstansiya vasitəsilə ötürüləcək elektrik, habelə fiber-optik və gələcəkdə neft-qaz xətlərinin keçəcəyi genişmiqyaslı kommunikasiya qovşağı olaraq fəaliyyət göstərəcəkdir.
İradə İsmayılova,
YAP Nizami rayon təşkilatının “Bəhruz Nuriyev küçəsi, 33” ərazi partiya təşkilatının sədr müavini
