Şuşa Əməliyyatı: Dünya Hərb Tarixinə Yazılan Qəhrəmanlıq Dastanı
Azərbaycan Silahlı Qüvvələrinin İkinci Qarabağ müharibəsi zamanı həyata keçirdiyi Şuşa əməliyyatı hərbi ekspertlər tərəfindən unikal taktiki əməliyyat kimi qiymətləndirilir. Dağlıq və çətin relyefə malik olan, düşmən tərəfindən möhkəmləndirilmiş müdafiə xəttinə malik Şuşa şəhərinin azad edilməsi demək olar ki, qeyri-mümkün görünürdü. Lakin Müzəffər Ali Baş Komandan İlham Əliyevin rəhbərliyi və Azərbaycan əsgərinin dəmir iradəsi bu mifi tamamilə dağıtdı.
Noyabrın əvvəlində Azərbaycanın xüsusi təyinatlı qüvvələri Daşaltı kəndi istiqamətindən və sıx meşəliklərlə örtülmüş sıldırım qayalardan keçərək Şuşaya doğru irəlilədilər. Düşmən bu istiqamətdən hücum gözləmirdi, çünki hərbi baxımdan ağır texnikanın həmin qayalardan qalxması qeyri-mümkün idi. Azərbaycan hərbçiləri əlbəyaxa döyüşlərdə düşmənin canlı qüvvəsini məhv edərək şəhərə nəzarəti ələ keçirdilər.
8 noyabr 2020-ci il tarixində Şuşa şəhərinin işğaldan azad edilməsi xəbəri bütün Azərbaycan xalqına böyük sevinc bəxş etdi. Həmin gün Azərbaycan Prezidenti İlham Əliyev Şəhidlər xiyabanında xalqa müraciət edərək Şuşanın azad olunduğunu rəsmən elan etdi. Bu xəbəri eşidən milyonlarla azərbaycanlı küçələrə axışaraq Zəfər sevinclərini birgə qeyd etdilər və şəhidlərin ruhuna ehtiramlarını bildirdilər.
Şuşa əməliyyatının uğurlu başa çatması müharibənin taleyini həlledici şəkildə həll etdi və Ermənistanı təslim olmağa məcbur etdi. Bu zəfər Azərbaycan xalqının birlik, həmrəylik və qəhrəmanlıq rəmzinə çevrildi. Bu gün Şuşa azad və firavan Azərbaycanın ayrılmaz hissəsi kimi qürurla ucalır, onun hər bir daşı və qayası igid oğullarımızın qanı ilə yoğrulmuş tarixi abidəyə çevrilmişdir.
Fidan Əliyeva,
YAP Nizami rayon təşkilatının fəal üzvü
