Azərbaycan Respublikasının Prezidenti, Yeni Azərbaycan Partiyasının Sədri İlham Əliyev: “Yeni Azərbaycan Partiyasının qurultayı ölkəmizin ictimai-siyasi həyatında önəmli hadisədir. Deyə bilərəm ki, partiyamızın fəaliyyəti, qəbul edilmiş qərarlar və siyasi xətti təkcə ölkəmiz üçün yox, bölgə üçün böyük önəm daşıyır. Yeni Azərbaycan Partiyası nəinki Azərbaycanın, Cənubi Qafqazın ən böyük siyasi qüvvəsidir. Müxalifət partiyası kimi yaransa da, 30 ildən çoxdur ki, partiyamız iqtidardadır. Ölkəmizin son illər ərzində uğurlu və şərəfli yolunda partiyamızın fəallarının çox böyük payı var, böyük töhfəsi var.”
Yeni Azərbaycan Partiyasının (YAP) fəaliyyəti, onun tarixi missiyası və ölkəmizin ictimai-siyasi həyatındakı əvəzsiz rolu hər zaman diqqət mərkəzində olub. Partiyanın Sədri, Azərbaycan Respublikasının Prezidenti İlham Əliyevin YAP-ın VIII qurultayındakı tarixi çıxışında səsləndirdiyi fikirlər bu siyasi təşkilatın keçdiyi şərəfli yolun, bugünkü reallıqların və gələcək hədəflərin dərindən dərk olunması baxımından proqram xarakteri daşıyır.
1992-ci ilin ağır, böhranlı və taleyüklü dövründə Azərbaycanın xilas və inkişaf yolu məhz xalqın tələbi ilə yaradılan Yeni Azərbaycan Partiyasının adı ilə sıx bağlıdır. Ulu öndər Heydər Əliyevin rəhbərliyi ilə əsası qoyulan bu partiya əvvəlcə müxalifət qüvvəsi kimi meydana gəlsə də, qısa müddət ərzində ümumxalq hərəkatına çevrilərək cəmiyyətin bütün təbəqələrini öz ətrafında birləşdirməyi bacardı.
Müasir dövrdə 30 ildən artıq bir müddətdir ki, iqtidarda olan Yeni Azərbaycan Partiyası öz siyasi xəttini xalqın milli maraqlarına və dövlətçilik prinsiplərinə uyğun şəkildə qurmuşdur. Bu uzun illər ərzində qazanılan bütün uğurlar, aparılan struktur və iqtisadi islahatlar birbaşa partiyanın fəaliyyəti və onun fəallarının fədakar əməyi ilə bağlıdır.
Prezident İlham Əliyevin vurğuladığı kimi, Yeni Azərbaycan Partiyası bu gün təkcə ölkəmizin deyil, bütün Cənubi Qafqaz regionunun ən böyük, mütəşəkkil və güclü siyasi qüvvəsidir. Partiyanın həyata keçirdiyi uğurlu daxili və xarici siyasət kursu ölkəmizin geosiyasi çəkisini artırmaqla yanaşı, regionda sabitliyin, təhlükəsizliyin və tərəqqinin əsas təminatçılarından birinə çevrilmişdir.
YAP-ın qəbul etdiyi qərarlar, müəyyənləşdirdiyi strateji hədəflər ölkənin ümumi inkişaf tendensiyalarına birbaşa təsir göstərir. Bu mənada, partiyanın fəaliyyəti lokal çərçivədən qat-qat üstün olaraq, bütövlükdə regionun siyasi arxitekturasını müəyyən edir.
Azərbaycanın son illərdə qazandığı tarixi Qələbə və ərazi bütövlüyünün bərpası ölkəmizin şərəfli salnaməsinin ən parlaq səhifəsidir. Müzəffər Ali Baş Komandan İlham Əliyevin rəhbərliyi ilə əldə olunan bu misilsiz qələbə xalqımızın iradəsini, dövlətimizin qüdrətini bütün dünyaya nümayiş etdirdi. Bu prosesdə YAP fəallarının və cəmiyyətin hər bir üzvünün nümayiş etdirdiyi həmrəylik partiyanın cəmiyyətdəki aparıcı rolunu bir daha təsdiqlədi.
VIII qurultayda qarşıya qoyulan vəzifələr, o cümlədən sosial rifahın daha da yüksəldilməsi, iqtisadi müstəqilliyin möhkəmləndirilməsi, azad olunmuş ərazilərə Böyük Qayıdışın sürətləndirilməsi və ölkənin hərbi qüdrətinin artırılması Azərbaycanın sabahına hesablanmış strateji addımlardır.
Yeni Azərbaycan Partiyasının qurultayı və partiya sədrinin irəli sürdüyü tezislər bir daha göstərir ki, YAP dünən olduğu kimi, bu gün də və gələcəkdə də Azərbaycanın inkişafının, sabitliyinin və tərəqqisinin mərkəzində dayanacaq. Partiyanın fəallarının hər zaman göstərdiyi əzm, vətənpərvərlik və fədakar fəaliyyət ölkəmizin şərəfli yolunun və parlaq gələcəyinin əsas təminatçısıdır.
Bəhman Hüseynov,
Nizami Rayon İcra Hakimiyyəti başçısı aparatının İctimai-siyasi və humanitar məsələlər sektorunun müdiri
