Azərbaycanın regional inkişaf siyasətində infrastruktur layihələri ilə yanaşı, iqtisadi fəaliyyətin genişləndirilməsi də mühüm yer tutur. Son iki onillikdə regionlarda yollar, məktəblər, xəstəxanalar, enerji və digər obyektlərin yaradılması üçün böyük layihələr həyata keçirilib. İndi bu infrastruktur bazasının üzərində yeni istehsal sahələrinin qurulması regional inkişafın növbəti mərhələlərindən biri kimi nəzərdən keçirilə bilər.
Dağ-mədən və metallurgiya sənayesinin inkişafı regionların iqtisadi potensialından istifadə baxımından xüsusi imkanlar yaradır. Yataqların yerləşdiyi ərazilərdə mədənlərin istismarı ilə yanaşı, emal müəssisələrinin yaradılması regionların iqtisadi strukturunu dəyişə bilər. Yeni müəssisələr ətrafında təchizat və xidmət zəncirinin formalaşması isə yerli sahibkarlıq üçün əlavə imkanlar yarada bilər.
Prezident İlham Əliyev müşavirədə yeni Dövlət Proqramının regionların sosial-iqtisadi inkişafı gündəliyini əks etdirdiyini bildirib. Bu yanaşma dağ-mədən sənayesinin yalnız ayrı-ayrı müəssisələrin fəaliyyəti kimi deyil, regional inkişafın tərkib hissəsi kimi nəzərdən keçirildiyini göstərir.
Regionlarda sənaye fəaliyyətinin artması əhalinin gəlir imkanlarına da təsir göstərə bilər. Lakin iqtisadi inkişafın dayanıqlı olması üçün sənaye ilə yanaşı, sosial infrastrukturun da inkişaf etdirilməsi vacibdir. Yeni yaşayış məntəqələri, məktəblər, səhiyyə müəssisələri və xidmət obyektləri sənaye layihələrini müşayiət etməlidir. Beləliklə, iqtisadi və sosial inkişafın paralel aparılması regionlarda daha dayanıqlı inkişaf mühiti formalaşdıra bilər.
Əhməd Talıbov,
YAP Nizami rayon təşkilatının “Heydər Əliyev prospekti, 152” ərazi partiya təşkilatının sədri
