Azərbaycanın müasir tarixində elə günlər var ki, onların əhəmiyyəti zaman keçdikcə daha da aydın görünür. 2020-ci il oktyabrın 4-ü də belə günlərdən biridir. Həmin tarixdə Cəbrayıl şəhərinin işğaldan azad edilməsi Azərbaycan xalqının ədalətə, tarixi torpaqlarına və milli suverenliyinə bağlılığının təntənəsinə çevrildi.
Cəbrayılın işğalı rayonun sosial-iqtisadi həyatına ağır zərbə vurmuşdu. Şəhər və kəndlər dağıntılara məruz qalmış, yaşayış evləri və ictimai obyektlər yararsız vəziyyətə düşmüşdü. Məcburi köçkün həyatı yaşayan insanlar illərlə doğma evlərinə qayıdacaqları günü gözləmiş, öz yurdlarına olan bağlılıqlarını qoruyub saxlamışdılar.
Vətən müharibəsinin başlanması ilə Azərbaycan Ordusu işğal altındakı ərazilərin azad edilməsi istiqamətində genişmiqyaslı əməliyyatlara başladı. Döyüş meydanında nümayiş etdirilən peşəkarlıq, əsgər və zabitlərin fədakarlığı, xalqın orduya dəstəyi qələbələrin əldə olunmasında mühüm rol oynadı. Cəbrayıl şəhərinin azad edilməsi bu mübarizənin ən əlamətdar nəticələrindən biri oldu.
Cəbrayıl uğrunda qazanılan qələbə Azərbaycan cəmiyyətində böyük ruh yüksəkliyi yaratdı. Bu hadisə bir daha göstərdi ki, milli birlik və məqsədyönlü fəaliyyət ən çətin vəzifələrin həyata keçirilməsində həlledici amillərdir. Şəhərin azad olunması həm də işğalın yaratdığı uzunmüddətli ayrılığın aradan qaldırılması üçün yeni imkanlar açdı.
Bu gün 4 oktyabr yalnız bir şəhərin azad edildiyi tarix deyil, həm də illərlə davam edən həsrətin sona çatmasına aparan yolun rəmzidir. Cəbrayılın dirçəldilməsi, yolların və digər infrastrukturun qurulması, yaşayış şəraitinin yaxşılaşdırılması gələcəyə hesablanmış mühüm addımlardır. Bu əlamətdar tarix gələcək nəsillərə Vətən sevgisi, birlik və əzmkarlıq nümunəsi kimi ötürülür.
Fariz Hüseyinli,
YAP Nizami rayon təşkilatının fəalı
