Cəbrayılın yenidən qurulması genişmiqyaslı dövlət investisiyalarını tələb edən prosesdir. Lakin uzunmüddətli inkişaf baxımından yalnız tikinti mərhələsi kifayət etmir. Yeni iqtisadi fəaliyyət sahələrinin yaradılması və məşğulluğun təmin edilməsi qayıdışın davamlılığının əsas şərtlərindəndir.
Bu baxımdan Cəbrayılın iqtisadi inkişafında sənaye parkı, kənd təsərrüfatı, enerji, logistika və xidmət sektorlarının paralel inkişaf etdirilməsi mühüm istiqamətlər təşkil edir. Rəsmi regional məlumatlarda “Araz Vadisi İqtisadi Zonası” Sənaye Parkında yeni müəssisələrin təməlqoyma mərasimləri, müxtəlif istehsal layihələri və kənd təsərrüfatı müəssisələri qeyd olunur.
İqtisadi fəallığın artması ilk növbədə məşğulluq imkanlarının genişlənməsi baxımından əhəmiyyətlidir. İnsanların doğma yurda qayıtması üçün mənzil əsas şərtlərdən biri olsa da, uzunmüddətli məskunlaşma üçün iş yerləri və gəlir imkanları da zəruridir.
Horovluda birinci mərhələdə yaşayış evləri ilə yanaşı iş yerlərinin yaradılması da nəzərdə tutulub. Prezidentin kənd sakinləri ilə görüşündə məktəb, uşaq bağçası, tibb məntəqəsi və iş yerlərinin yaradıldığı bildirilib.
Bu mənada Cəbrayılın iqtisadi bərpasının əsas göstəricilərindən biri yeni müəssisələrin sayından daha geniş anlayışdır. Əsas məsələ iqtisadi fəaliyyətin insanların gündəlik həyatına, məşğulluğuna və şəhər-kənd həyatının davamlılığına çevrilməsidir.
Zeynəb Hacıyeva,
YAP Nizami rayon təşkilatının fəalı
