AnalitikaGündəmSiyasət

YAP-34 il: Böyük Zəfər, suverenliyin bərpası və Böyük Qayıdış prosesi

Azərbaycanın ərazi bütövlüyünün və tam suverenliyinin bərpası müstəqillik tariximizin ən parlaq səhifəsidir.Yeni Azərbaycan Partiyasının 34-cü ildönümü bu tarixi Zəfərin yaratdığı yeni geosiyasi və ictimai reallıqlar fonunda qeyd olunur.

İllər boyu aparılan ardıcıl dövlət quruculuğu, iqtisadi güclənmə və ordu quruculuğu bu böyük qələbənin əsasını təşkil etdi.Güclü iqtisadiyyat və müstəqil xarici siyasət Azərbaycanın öz haqlı mövqeyini beynəlxalq səviyyədə qətiyyətlə müdafiə etməsinə şərait yaratdı.Cəmiyyətdəki sabitlik və xalq-iqtidar birliyi ən həlledici anlarda milli iradənin vahid nöqtədə cəmləşməsini təmin etdi.

2020-ci ilin payızında başlanan Vətən müharibəsi xalqımızın ədalət və suverenlik uğrunda qətiyyətini bütün dünyaya nümayiş etdirdi. 44 günlük müharibədə əldə olunan Zəfər tarixi ədalətin bərpasında dönüş nöqtəsi oldu.

“Biz haqq yolundayıq. Biz öz torpağımızı azad edirik, özümüzü müdafiə edirik.”- Prezident İlham Əliyev

2023-cü ilin sentyabrında həyata keçirilən antiterror tədbirləri nəticəsində Azərbaycanın bütün ərazilərində konstitusion quruluş və suverenlik tam bərpa edildi. Dövlət bayrağının ölkəmizin bütün guşələrində dalğalanması xalqın uzunmüddətli arzusunun reallaşması idi. Bu tarixi nailiyyət təkcə hərbi-siyasi uğur deyil, həm də milli özünəinamın və dövlətçilik ruhunun yüksəlişidir.Yeni Azərbaycan Partiyası bu proseslər zamanı xalqın milli həmrəyliyinin möhkəmləndirilməsində və ictimai dəstəyin səfərbər olunmasında fəal iştirak etdi. Partiya sıralarında təmsil olunan vətəndaşlar, gənclər və veteranlar dövlətçilik mövqeyindən çıxış edərək ictimai fəallıq göstərdilər.

Zəfərdən dərhal sonra işğaldan azad edilmiş ərazilərdə genişmiqyaslı bərpa və yenidənqurma proqramlarına start verildi. Mina təhlükəsinin aradan qaldırılması təhlükəsiz mühitin yaradılması və quruculuq işlərinin başlanması üçün ilk vacib addım oldu.Qısa müddətdə yeni avtomobil yolları, dəmir yolları, tunellər və beynəlxalq hava limanları inşa edildi. Füzuli, Zəngilan və Laçın beynəlxalq hava limanlarının istifadəyə verilməsi bölgənin nəqliyyat əlçatanlığını əhəmiyyətli dərəcədə artırdı. “Ağıllı şəhər” və “Ağıllı kənd” konsepsiyaları əsasında yaşayış məntəqələrinin salınması müasir şəhərsalma standartlarını tətbiq etdi.

“Qarabağı və Şərqi Zəngəzuru cənnətə çevirəcəyik.”- Prezident İlham Əliyev

Yaşıl enerji zonasının yaradılması təşəbbüsü bölgədə ekoloji dayanıqlığı və bərpaolunan enerji potensialının istifadəsini ön plana çıxardı. Su elektrik stansiyalarının bərpası və yeni enerji xətlərinin çəkilməsi regionun enerji təhlükəsizliyini təmin etdi.

Bu gün “Böyük Qayıdış” proqramı çərçivəsində keçmiş məcburi köçkünlərin öz doğma yurdlarına mərhələli qayıdışı həyata keçirilir. Yeni salınan evlər, məktəblər, xəstəxanalar və sosial obyektlər qayıdan ailələr üçün layiqli yaşayış şəraiti yaradır.

Tarixi, dini və mədəni abidələrin bərpası milli-mənəvi irsin qorunması və gələcək nəsillərə ötürülməsi baxımından mühüm əhəmiyyət daşıyır. Şuşanın Azərbaycanın mədəniyyət paytaxtı elan edilməsi və burada keçirilən beynəlxalq tədbirlər şəhərin tarixi simasını canlandırdı. Yeni Azərbaycan Partiyası Qarabağ və Şərqi Zəngəzurda aparılan quruculuq işlərinin ictimaiyyətə çatdırılmasında ardıcıl fəaliyyət göstərir.

Azərbaycanın qazandığı suverenlik Cənubi Qafqazda sülh, təhlükəsizlik və əməkdaşlıq gündəliyini yeni mərhələyə daşıyıb. “Biz sülh istəyirik, sabitlik istəyirik və regionda dayanıqlı əməkdaşlığın tərəfdarıyıq.”-Prezident İlham Əliyev

Müharibənin ağrılarını yaşamış ailələrin dövlət qayğısı ilə əhatə olunması sosial həmrəyliyin göstəricisidir.Şəhid ailələrinə və qazilərə göstərilən diqqət və dəstək dövlət siyasətinin əsas prioritetlərindən biri kimi davam etdirilir.Gənclərin vətənpərvərlik ruhunda yetişdirilməsi və tarixi həqiqətlərin öyrədilməsi gələcək nəsillərin dövlətçilik şüurunu gücləndirir.

Böyük Qayıdış prosesi təkcə məkan dəyişikliyi deyil, həm də mənəvi qayıdış və tarixi ədalətin təntənəsidir.Hər yeni açılan məktəb və yaşayış məhəlləsi həyatın doğma torpaqlara qayıdışının rəmzidir. Dövlətin gücü və xalqın əzmkarlığı sayəsində azad edilmiş torpaqlar qısa müddətdə dirçəldilir.

Yeni Azərbaycan Partiyasının 34-cü ildönümü bu böyük qələbə və quruculuq mərhələsinin məsuliyyətini bir daha vurğulayır. Qarşıda duran vəzifə əldə edilmiş tarixi nailiyyətləri qorumaq və bölgənin davamlı inkişafını təmin etməkdir. Qalib dövlətin vətəndaşı olmaq qüruru gələcək daha böyük nailiyyətlərə doğru inamla irəliləməyə ruhlandırır.

Şəlalə Hüseynova,
Nizami rayonu 229 saylı məktəbin tarix müəllimi

Oxşar Xəbərlər

Back to top button