AnalitikaGündəmSiyasət

Yeni Azərbaycan Partiyasının yaranması: Tarixi zərurət və dövlətçiliyin xilası

Yeni Azərbaycan Partiyasının (YAP) yaradılmasının 34-cü ildönümü müasir Azərbaycanın siyasi tarixində xüsusi mərhələni təşkil edir.

1992-ci il noyabrın 21-də Naxçıvanda təsis edilən partiya ölkənin müstəqilliyini qorumaq və dövlətçiliyi möhkəmləndirmək zərurətindən doğdu. Doxsanıncı illərin əvvəlində gənc respublika ağır siyasi böhran, iqtisadi tənəzzül, idarəetmə boşluğu və xarici təhdidlərlə üz-üzə idi. Daxili çəkişmələr və hakimiyyət böhranı müstəqil dövlətin gələcəyi üçün ciddi risklər yaradırdı. Xalqın, ziyalıların və ictimai fəalların müraciəti ilə ümummilli lider Heydər Əliyevin rəhbərliyi altında yeni siyasi qüvvənin formalaşması qaçılmaz oldu.

Təsis konfransında 550 nümayəndənin iştirakı və Heydər Əliyevin partiyanın sədri seçilməsi təşkilatın ideoloji ağırlığını və liderlik sütununu müəyyənləşdirdi. Bu addım cəmiyyətdə ümid işığı yandırdı və dövlətçilik tərəfdarlarını vahid məqsəd ətrafında birləşdirdi.

“Yeni Azərbaycan Partiyası dünənin, bu günün və gələcəyin partiyasıdır.” – Heydər Əliyev

Partiya qısa müddətdə ölkənin ən mütəşəkkil və nüfuzlu siyasi təşkilatına çevrilərək xalqın etimadını qazandı. 1993-cü ildə xalqın təkidli tələbi ilə Heydər Əliyevin hakimiyyətə qayıdışı dövləti dərin böhrandan çıxardı. Bu dönüşlə birlikdə partiyanın proqram prinsipləri dövlət siyasətinin əsas xətti ilə uzlaşaraq əməli nəticələr verməyə başladı.Atəşkəsin əldə olunması və daxili sabitliyin bərpası gələcək iqtisadi və hüquqi islahatlar üçün təməl yaratdı. Hüquqi dövlət quruculuğu, vətəndaş həmrəyliyi və sosial ədalət ideyaları partiyanın fəaliyyətində əsas istiqamətlər kimi təsbit olundu. YAP yalnız hakimiyyət strukturlarında təmsil olunan qurum kimi deyil, cəmiyyətin geniş təbəqələrini əhatə edən ictimai-siyasi dayaq kimi möhkəmləndi. Partiyanın regionlarda yerli təşkilatlarının fəallaşması mərkəzlə bölgələr arasında siyasi-ictimai əlaqələri gücləndirdi.

1999-cu ildə keçirilən I Qurultay partiyanın institusional strukturunu təkmilləşdirdi və yeni strateji hədəflər müəyyənləşdirdi.

“Bizim partiyamız xalqın partiyasıdır, xalqın istəyi ilə yaranıb və xalqın mənafeyinə xidmət edir.” — Heydər Əliyev

Ulu Öndərin siyasi kursu onun layiqli davamçısı Prezident İlham Əliyevin rəhbərliyi altında yeni mərhələdə davam etdirildi. 2003-cü ildən etibarən həyata keçirilən islahatlar sabitliyi qorumaqla yanaşı, sürətli inkişaf və modernləşmə modelini önə çıxardı. Partiya üzvləri dövlət siyasətinin izahında, ictimai maarifləndirmədə və vətəndaş təşəbbüslərinin dəstəklənməsində fəal rol oynadılar. Qadınların və gənclərin partiya daxilində və ictimai-siyasi həyatda fəallığının artması təşkilata yeni dinamizm gətirdi. VII Qurultayda qəbul edilən yenilənmiş Nizamnamə və struktur islahatları partiyanı müasir dövrün tələblərinə uyğunlaşdırdı. Veteranlar Şurası və Gənclər Birliyi nəsillərarası varisliyin və təcrübə mübadiləsinin mühüm platformasına çevrildi.

“Yeni Azərbaycan Partiyası ölkəmizin inkişafında, sabitliyin qorunmasında mühüm rol oynayıb və bundan sonra da oynayacaqdır.”- Prezident İlham Əliyev

Müstəqil xarici siyasət kursu ölkənin milli maraqlarının beynəlxalq müstəvidə ardıcıl müdafiəsini təmin etdi.

Daxili ictimai-siyasi sabitlik və siyasi dialoq mühiti dövlətçiliyin möhkəmlənməsinə əlavə güc verdi. Azərbaycanın ərazi bütövlüyünün və suverenliyinin tam bərpası 34 illik dövlətçilik və siyasi xəttin tarixi zirvəsi oldu. Vətən müharibəsindəki Qələbə və suverenliyin tam təmin olunması xalq-iqtidar birliyinin sarsılmazlığını göstərdi.

Azad edilmiş ərazilərdə aparılan bərpa işləri dövlətin iqtisadi və təşkilati gücünün bariz nümunəsidir. Otuz dörd il ərzində toplanmış siyasi təcrübə yeni çağırışlara çevik və praqmatik cavab verməyə imkan yaradır.

Partiyanın hər bir üzvü milli maraqlara sədaqət və dövlətçilik məsuliyyəti nümunəsi göstərməyə çalışır. Gələcək nəsillərə güclü, suveren və davamlı inkişaf edən dövlət mirası qoymaq əsas strateji hədəfdir.

Yeni Azərbaycan Partiyasının 34 illik yolu müstəqilliyin qorunmasından böyük quruculuq və inkişaf mərhələsinə gedən şərəfli tarixdir.

Cəmalə Əsgərova,
Nizami rayonu 201 saylı məktəbin tarix müəllimi

Oxşar Xəbərlər

Həmçinin baxın
Close
Back to top button